Annapurna Stotraअन्नपूर्णा स्तोत्रम्

01

नित्यानन्दकरी वराभयकरी सौन्दर्यरत्नाकरी निर्धूताखिलघोरपावनकरी प्रत्यक्षमाहेश्वरी । प्रालेयाचलवंशपावनकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ १॥

Nityananda-kari varabhaya-kari saundarya-ratnakari nirdhuta-khila-ghora-pavana-kari pratyaksha-maheshvari | praleyachala-vamsha-pavana-kari kashi-puradhishvari bhiksham dehi kripavalambana-kari matannapurneshvari || 1 ||

02

नानारत्नविचित्रभूषणकरी हेमाम्बराडम्बरी मुक्ताहारविलम्बमानविलसद्वक्षोजकुम्भान्तरी । काश्मीरागरुवासिता रुचिकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ २॥

Nana-ratna-vichitra-bhushana-kari hemambaradambari mukta-hara-vilambamana-vilasad-vakshoja-kumbhantari | kashmira-garu-vasita ruchikari kashi-puradhishvari bhiksham dehi kripavalambana-kari matannapurneshvari || 2 ||

03

योगानन्दकरी रिपुक्षयकरी धर्मार्थनिष्ठाकरी चन्द्रार्कानलभासमानलहरी त्रैलोक्यरक्षाकरी । सर्वैश्वर्यसमस्तवाञ्छितकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ३॥

Yogananda-kari ripu-kshaya-kari dharmartha-nishtha-kari chandrarkanala-bhasamana-lahari trailokya-raksha-kari | sarvaishvarya-samasta-vanchita-kari kashi-puradhishvari bhiksham dehi kripavalambana-kari matannapurneshvari || 3 ||

04

कैलासाचलकन्दरालयकरी गौरी उमा शङ्करी कौमारी निगमार्थगोचरकरी ओङ्कारबीजाक्षरी । मोक्षद्वारकपाटपाटनकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ४॥

Kailasachala-kandaralaya-kari gauri uma shankari kaumari nigamartha-gochara-kari onkara-bijakshari | moksha-dvara-kapata-patana-kari kashi-puradhishvari bhiksham dehi kripavalambana-kari matannapurneshvari || 4 ||

05

दृश्यादृश्यविभूतिवाहनकरी ब्रह्माण्डभाण्डोदरी लीलानाटकसूत्रभेदनकरी विज्ञानदीपाङ्कुरी । श्रीविश्वेशमनःप्रसादनकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ५॥

Drishyadrishya-vibhuti-vahana-kari brahmanda-bhandodari lila-nataka-sutra-bhedana-kari vijnana-dipankuri | shri-vishvesha-manah-prasadana-kari kashi-puradhishvari bhiksham dehi kripavalambana-kari matannapurneshvari || 5 ||

06

उर्वी सर्वजनेश्वरी भगवती मातान्नपूर्णेश्वरी वेणीनीलसमानकुन्तलधरी नित्यान्नदानेश्वरी । सर्वानन्दकरी सदाशुभकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ६॥

Urvi sarva-janeshvari bhagavati matannapurneshvari veni-nila-samana-kuntala-dhari nityanna-daneshvari | sarvananda-kari sadashubha-kari kashi-puradhishvari bhiksham dehi kripavalambana-kari matannapurneshvari || 6 ||

07

आदिक्षान्तसमस्तवर्णनकरी शम्भोस्त्रिभावाकरी काश्मीरा त्रिजलेश्वरी त्रिलहरी नित्याङ्कुरा शर्वरी । कामाकाङ्क्षकरी जनोदयकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ७॥

Adi-kshanta-samasta-varnana-kari shambhos tri-bhava-kari kashmira tri-jaleshvari tri-lahari nityankura sharvari | kama-kanksha-kari janodaya-kari kashi-puradhishvari bhiksham dehi kripavalambana-kari matannapurneshvari || 7 ||

08

देवी सर्वविचित्ररत्नरचिता दाक्षायणी सुन्दरी वामे स्वादुपयोधरा प्रियकरी सौभाग्यमाहेश्वरी । भक्ताभीष्टकरी सदाशुभकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ८॥

Devi sarva-vichitra-ratna-rachita dakshayani sundari vame svadu-payodhara priya-kari saubhagya-maheshvari | bhaktabhishta-kari sadashubha-kari kashi-puradhishvari bhiksham dehi kripavalambana-kari matannapurneshvari || 8 ||

09

चन्द्रार्कानलकोटिकोटिसदृशा चन्द्रांशुबिम्बाधरी चन्द्रार्काग्निसमानकुण्डलधरी चन्द्रार्कवर्णेश्वरी । मालापुस्तकपाशसाङ्कुशधरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ ९॥

Chandrarkanala-koti-koti-sadrisha chandramshu-bimbadhari chandrarkagni-samana-kundala-dhari chandrarka-varneshvari | mala-pustaka-pasha-sankusha-dhari kashi-puradhishvari bhiksham dehi kripavalambana-kari matannapurneshvari || 9 ||

10

क्षत्रत्राणकरी महाभयकरी माता कृपासागरी साक्षान्मोक्षकरी सदा शिवकरी विश्वेश्वरी श्रीधरी । दक्षाक्रन्दकरी निरामयकरी काशीपुराधीश्वरी भिक्षां देहि कृपावलम्बनकरी मातान्नपूर्णेश्वरी ॥ १०॥

Kshatra-trana-kari mahabhaya-kari mata kripasagari sakshan moksha-kari sada shiva-kari vishveshvari shridhari | dakshakranda-kari niramaya-kari kashi-puradhishvari bhiksham dehi kripavalambana-kari matannapurneshvari || 10 ||

11

अन्नपूर्णे सदापूर्णे शङ्करप्राणवल्लभे । ज्ञानवैराग्यसिद्ध्यर्थं भिक्षां देहि च पार्वति ॥ ११॥

Annapurne sada-purne shankara-prana-vallabhe | jnana-vairagya-siddhyartham bhiksham dehi cha parvati || 11 ||

12

माता मे पार्वती देवी पिता देवो महेश्वरः । बान्धवाः शिवभक्ताश्च स्वदेशो भुवनत्रयम् ॥ १२॥

Mata me parvati devi pita devo maheshvarah | bandhavah shiva-bhaktash cha sva-desho bhuvana-trayam || 12 ||