Stotra
Navagraha Stotraनवग्रह स्तोत्रम्
- Deity
- The nine grahas
- Kind
- Stotra
Source: Vyasa — sanskritdocuments.org navanew.itx (japākusuma recension)
01
जपाकुसुमसंकाशं काश्यपेयं महाद्युतिम् । तमोऽरिं सर्वपापघ्नं प्रणतोऽस्मि दिवाकरम् ॥ १॥
Japa-kusuma-sankasham kashyapeyam maha-dyutim | tamo-arim sarva-papa-ghnam pranato-smi divakaram || 1 ||
02
दधिशङ्खतुषाराभं क्षीरोदार्णवसंभवम् । नमामि शशिनं सोमं शम्भोर्मुकुटभूषणम् ॥ २॥
Dadhi-shankha-tusharabham kshirodarnava-sambhavam | namami shashinam somam shambhor mukuta-bhushanam || 2 ||
03
धरणीगर्भसंभूतं विद्युत्कान्तिसमप्रभम् । कुमारं शक्तिहस्तं तं मङ्गलं प्रणमाम्यहम् ॥ ३॥
Dharani-garbha-sambhutam vidyut-kanti-sama-prabham | kumaram shakti-hastam tam mangalam pranamamy aham || 3 ||
04
प्रियङ्गुकलिकाश्यामं रूपेणाप्रतिमं बुधम् । सौम्यं सौम्यगुणोपेतं तं बुधं प्रणमाम्यहम् ॥ ४॥
Priyangu-kalika-shyamam rupena-pratimam budham | saumyam saumya-gunopetam tam budham pranamamy aham || 4 ||
05
देवानां च ऋषीणां च गुरुं काञ्चनसंनिभम् । बुद्धिभूतं त्रिलोकेशं तं नमामि बृहस्पतिम् ॥ ५॥
Devanam cha rishinam cha gurum kanchana-sannibham | buddhi-bhutam trilokesham tam namami brihaspatim || 5 ||
06
हिमकुन्दमृणालाभं दैत्यानां परमं गुरुम् । सर्वशास्त्रप्रवक्तारं भार्गवं प्रणमाम्यहम् ॥ ६॥
Hima-kunda-mrinalabham daityanam paramam gurum | sarva-shastra-pravaktaram bhargavam pranamamy aham || 6 ||
07
नीलांजनसमाभासं रविपुत्रं यमाग्रजम् । छायामार्तण्डसंभूतं तं नमामि शनैश्चरम् ॥ ७॥
Nilanjana-samabhasam ravi-putram yamagrajam | chhaya-martanda-sambhutam tam namami shanaischaram || 7 ||
08
अर्धकायं महावीर्यं चन्द्रादित्यविमर्दनम् । सिंहिकागर्भसंभूतं तं राहुं प्रणमाम्यहम् ॥ ८॥
Ardha-kayam maha-viryam chandraditya-vimardanam | simhika-garbha-sambhutam tam rahum pranamamy aham || 8 ||
09
पलाशपुष्पसंकाशं तारकाग्रहमस्तकम् । रौद्रं रौद्रात्मकं घोरं तं केतुं प्रणमाम्यहम् ॥ ९॥
Palasha-pushpa-sankasham taraka-graha-mastakam | raudram raudratmakam ghoram tam ketum pranamamy aham || 9 ||
10
इति व्यासमुखोद्गीतं यः पठेत्सुसमाहितः । दिवा वा यदि वा रात्रौ विघ्नशान्तिर्भविष्यति ॥ १०॥
Iti vyasa-mukhodgitam yah pathet susamahitah | diva va yadi va ratrau vighna-shantir bhavishyati || 10 ||
11
नरनारीनृपाणां च भवेद्दुःस्वप्ननाशनम् । ऐश्वर्यमतुलं तेषामारोग्यं पुष्टिवर्धनम् ॥ ११॥
Nara-nari-nripanam cha bhaved duhsvapna-nashanam | aishvaryam atulam tesham arogyam pushti-vardhanam || 11 ||
12
ग्रहनक्षत्रजाः पीडास्तस्कराग्निसमुद्भवाः । ताः सर्वाः प्रशमं यान्ति व्यासो ब्रूते न संशयः ॥ १२॥
Graha-nakshatra-jah pidas taskaragni-samudbhavah | tah sarvah prashamam yanti vyaso brute na sanshayah || 12 ||