Kanakadhara Stotraकनकधारा स्तोत्रम्

01

वन्दे वन्दारुमन्दारमिन्दिरानन्दकन्दलम् । अमन्दानन्दसन्दोहबन्धुरं सिन्धुराननम् ॥

Vande vandaru-mandaram indiranananda-kandalam | amandananda-sandoha-bandhuram sindhurananam ||

02

अङ्गं हरेः पुलकभूषणमाश्रयन्ती भृङ्गाङ्गनेव मुकुलाभरणं तमालम् । अङ्गीकृताखिलविभूतिरपाङ्गलीला माङ्गल्यदास्तु मम मङ्गलदेवतायाः ॥ १॥

Angam hareh pulaka-bhushanam ashrayanti bhringanganeva mukulabharanam tamalam | angikritakhila-vibhutir apanga-lila mangalyada-stu mama mangala-devatayah || 1 ||

03

मुग्धा मुहुर्विदधती वदने मुरारेः प्रेमत्रपाप्रणिहितानि गतागतानि । माला दृशोर्मधुकरीव महोत्पले या सा मे श्रियं दिशतु सागरसम्भवायाः ॥ २॥

Mugdha muhur vidadhati vadane murareh prema-trapa-pranihitani gatagatani | mala drishor madhukariva mahotpale ya sa me shriyam dishatu sagara-sambhavayah || 2 ||

04

विश्वामरेन्द्रपदविभ्रमदानदक्षम् आनन्दहेतुरधिकं मुरविद्विषोऽपि । ईषन्निषीदतु मयि क्षणमीक्षणार्धम् इन्दीवरोदरसहोदरमिन्दिरायाः ॥ ३॥

Vishvamarendra-pada-vibhrama-dana-daksham ananda-hetur adhikam mura-vidvisho-pi | ishan nishidatu mayi kshanam ikshanardham indivarodara-sahodaram indirayah || 3 ||

05

आमीलिताक्षमधिगम्य मुदा मुकुन्दम् आनन्दकन्दमनिमेषमनङ्गतन्त्रम् । आकेकरस्थितकनीनिकपक्ष्मनेत्रं भूत्यै भवेन्मम भुजङ्गशयाङ्गनायाः ॥ ४॥

Amilitaksham adhigamya muda mukundam ananda-kandam animesham ananga-tantram | akekara-sthita-kaninika-pakshma-netram bhutyai bhaven mama bhujanga-shayanganayah || 4 ||

06

बाह्वन्तरे मधुजितः श्रितकौस्तुभे या हारावलीव हरिनीलमयी विभाति । कामप्रदा भगवतोऽपि कटाक्षमाला कल्याणमावहतु मे कमलालयायाः ॥ ५॥

Bahvantare madhujitah shrita-kaustubhe ya haravali-va hari-nila-mayi vibhati | kama-prada bhagavato-pi kataksha-mala kalyanam avahatu me kamalalayayah || 5 ||

07

कालाम्बुदालिललितोरसि कैटभारेः धाराधरे स्फुरति या तडिदङ्गनेव । मातुस्समस्तजगतां महनीयमूर्तिः भद्राणि मे दिशतु भार्गवनन्दनायाः ॥ ६॥

Kalambudalilalitorasi kaitabhareh dharadhare sphurati ya tadid-anganeva | matus samasta-jagatam mahaniya-murtih bhadrani me dishatu bhargava-nandanayah || 6 ||

08

प्राप्तं पदं प्रथमतः खलु यत्प्रभावात् माङ्गल्यभाजि मधुमाथिनि मन्मथेन । मय्यापतेत्तदिह मन्थरमीक्षणार्धं मन्दालसं च मकरालयकन्यकायाः ॥ ७॥

Praptam padam prathamatah khalu yat-prabhavat mangalya-bhaji madhu-mathini manmathena | mayy apatet tad iha mantharam ikshanardham mandalasam cha makaralaya-kanyakayah || 7 ||

09

दद्याद्दयानुपवनो द्रविणाम्बुधाराम् अस्मिन्नकिञ्चनविहङ्गशिशौ विषण्णे । दुष्कर्मघर्ममपनीय चिराय दूरं नारायणप्रणयिनीनयनाम्बुवाहः ॥ ८॥

Dadyad dayanupavano dravinambu-dharam asminn akinchana-vihanga-shishau vishanne | dushkarma-gharmam apaniya chiraya duram narayana-pranayini-nayanambu-vahah || 8 ||

10

इष्टाविशिष्टमतयोऽपि यया दयार्द्र- दृष्ट्या त्रिविष्टपपदं सुलभं लभन्ते । दृष्टिः प्रहृष्टकमलोदरदीप्तिरिष्टां पुष्टिं कृषीष्ट मम पुष्करविष्टरायाः ॥ ९॥

Ishtavishishta-matayo-pi yaya dayardra- drishtya trivishtapa-padam sulabham labhante | drishtih prahrishta-kamalodara-diptir ishtam pushtim krishishta mama pushkara-vishtarayah || 9 ||

11

गीर्देवतेति गरुडध्वजसुन्दरीति शाकम्भरीति शशिशेखरवल्लभेति । सृष्टिस्थितिप्रलयकेलिषु संस्थितायै तस्यै नमस्त्रिभुवनैकगुरोस्तरुण्यै ॥ १०॥

Gir-devateti garuda-dhvaja-sundariti shakambhariti shashi-shekhara-vallabheti | srishti-sthiti-pralaya-kelishu samsthitayai tasyai namas tribhuvanaika-guros tarunyai || 10 ||

12

श्रुत्यै नमोऽस्तु शुभकर्मफलप्रसूत्यै रत्यै नमोऽस्तु रमणीयगुणार्णवायै । शक्त्यै नमोऽस्तु शतपत्रनिकेतनायै पुष्ट्यै नमोऽस्तु पुरुषोत्तमवल्लभायै ॥ ११॥

Shrutyai namo-stu shubha-karma-phala-prasutyai ratyai namo-stu ramaniya-gunarnavayai | shaktyai namo-stu shata-patra-niketanayai pushtyai namo-stu purushottama-vallabhayai || 11 ||

13

नमोऽस्तु नालीकनिभाननायै नमोऽस्तु दुग्धोदधिजन्मभूम्यै । नमोऽस्तु सोमामृतसोदरायै नमोऽस्तु नारायणवल्लभायै ॥ १२॥

Namo-stu nalika-nibhananayai namo-stu dugdhodadhi-janma-bhumyai | namo-stu somamrita-sodarayai namo-stu narayana-vallabhayai || 12 ||

14

सम्पत्कराणि सकलेन्द्रियनन्दनानि साम्राज्यदानविभवानि सरोरुहाक्षि । त्वद्वन्दनानि दुरिताहरणोद्यतानि मामेव मातरनिशं कलयन्तु मान्ये ॥ १३॥

Sampat-karani sakalendriya-nandanani samrajya-dana-vibhavani saroruhakshi | tvad-vandanani duritaharana-udyatani mam eva matar anisham kalayantu manye || 13 ||

15

यत्कटाक्षसमुपासनाविधिः सेवकस्य सकलार्थसम्पदः । सन्तनोति वचनाङ्गमानसैः त्वां मुरारिहृदयेश्वरीं भजे ॥ १४॥

Yat-kataksha-samupasana-vidhih sevakasya sakalartha-sampadah | santanoti vachananga-manasaih tvam murari-hridayeshvarim bhaje || 14 ||

16

सरसिजनिलये सरोजहस्ते धवलतमांशुकगन्धमाल्यशोभे । भगवति हरिवल्लभे मनोज्ञे त्रिभुवनभूतिकरि प्रसीद मह्यम् ॥ १५॥

Sarasija-nilaye saroja-haste dhavalatam-amshuka-gandha-malya-shobhe | bhagavati hari-vallabhe manojne tribhuvana-bhuti-kari prasida mahyam || 15 ||

17

दिग्हस्तिभिः कनककुम्भमुखावसृष्ट- स्वर्वाहिनीविमलचारुजलप्लुताङ्गीम् । प्रातर्नमामि जगतां जननीमशेष- लोकाधिनाथगृहिणीममृताब्धिपुत्रीम् ॥ १६॥

Dig-hastibhih kanaka-kumbha-mukhavasrishta- svar-vahini-vimala-charu-jala-plutangim | pratar namami jagatam jananim ashesha- lokadhinatha-grihinim amritabdhi-putrim || 16 ||

18

कमले कमलाक्षवल्लभे त्वं करुणापूरतरङ्गितैरपाङ्गैः । अवलोकय मामकिञ्चनानां प्रथमं पात्रमकृत्रिमं दयायाः ॥ १७॥

Kamale kamalaksha-vallabhe tvam karuna-pura-tarangitair apangaih | avalokaya mam akinchananam prathamam patram akritrimam dayayah || 17 ||

19

स्तुवन्ति ये स्तुतिभिरमीभिरन्वहं त्रयीमयीं त्रिभुवनमातरं रमाम् । गुणाधिका गुरुतरभाग्यभागिनो भवन्ति ते भुवि बुधभाविताशयाः ॥ १८॥

Stuvanti ye stutibhir amibhir anvaham trayimayim tribhuvana-mataram ramam | gunadhika gurutara-bhagya-bhagino bhavanti te bhuvi budha-bhavitashayah || 18 ||