Sankat Mochan Hanuman Ashtakसंकट मोचन हनुमान अष्टक

01

बाल समय रवि भक्षि लियो तब, तीनहुँ लोक भयो अंधियारो। ताहि सों त्रास भयो जग को, यह संकट काहु सों जात न टारो। देवन आनि करी बिनती तब, छाड़ि दयो रवि कष्ट निवारो। को नहीं जानत है जग में कपि, संकटमोचन नाम तिहारो॥

Bal samay ravi bhakshi liyo tab, tinahun lok bhayo andhiyaro | Tahi son tras bhayo jag ko, yah sankat kahu son jat na taro | Devan ani kari binati tab, chhadi dayo ravi kasht nivaro | Ko nahin janat hai jag men kapi, Sankatmochan naam tiharo ||

02

बालि की त्रास कपीस बसैं गिरि, जात महाप्रभु पंथ निहारो। चौंकि महामुनि साप दियो तब, चाहिए कौन बिचार बिचारो। कै द्विज रूप लिवाय महाप्रभु, सो तुम दास के शोक निवारो। को नहीं जानत है जग में कपि, संकटमोचन नाम तिहारो॥

Bali ki tras kapis basain giri, jat mahaprabhu panth niharo | Chaunki mahamuni sap diyo tab, chahiye kaun bichar bicharo | Kai dwij roop livay mahaprabhu, so tum das ke shok nivaro | Ko nahin janat hai jag men kapi, Sankatmochan naam tiharo ||

03

अंगद के संग लेन गए सिय, खोज कपीस यह बैन उचारो। जीवत ना बचिहौ हम सो जु, बिना सुधि लाए इहाँ पगु धारो। हेरी थके तट सिंधु सबै तब, लाए सिया-सुधि प्राण उबारो। को नहीं जानत है जग में कपि, संकटमोचन नाम तिहारो॥

Angad ke sang len gaye siy, khoj kapis yah bain ucharo | Jivat na bachihau ham so ju, bina sudhi lae ihan pagu dharo | Heri thake tat sindhu sabai tab, lae siya-sudhi pran ubaro | Ko nahin janat hai jag men kapi, Sankatmochan naam tiharo ||

04

रावण त्रास दई सिय को सब, राक्षसि सों कहि शोक निवारो। ताहि समय हनुमान महाप्रभु, जाए महा रजनीचर मारो। चाहत सीय असोक सों आगि सु, दै प्रभु मुद्रिका शोक निवारो। को नहीं जानत है जग में कपि, संकटमोचन नाम तिहारो॥

Ravan tras dai siy ko sab, rakshasi son kahi shok nivaro | Tahi samay Hanuman mahaprabhu, jae maha rajanichar maro | Chahat siy ashok son agi su, dai prabhu mudrika shok nivaro | Ko nahin janat hai jag men kapi, Sankatmochan naam tiharo ||

05

बान लाग्यो उर लछिमन के तब, प्राण तजे सूत रावन मारो। लै गृह बैद्य सुषेन समेत, तबै गिरि द्रोण सु बीर उपारो। आनि सजीवन हाथ दिए तब, लछिमन के तुम प्राण उबारो। को नहीं जानत है जग में कपि, संकटमोचन नाम तिहारो॥

Ban lagyo ur Lachhiman ke tab, pran taje sut Ravan maro | Lai grih baidya Sushen samet, tabai giri Dron su bir uparo | Ani sanjivan hath die tab, Lachhiman ke tum pran ubaro | Ko nahin janat hai jag men kapi, Sankatmochan naam tiharo ||

06

रावण युद्ध अजान कियो तब, नाग कि फाँस सबै सिर डारो। श्रीरघुनाथ समेत सबै दल, मोह भयो यह संकट भारो। आनि खगेस तबै हनुमान जु, बंधन काटि सुत्रास निवारो। को नहीं जानत है जग में कपि, संकटमोचन नाम तिहारो॥

Ravan yuddh ajan kiyo tab, nag ki phans sabai sir daro | Shri Raghunath samet sabai dal, moh bhayo yah sankat bharo | Ani khages tabai Hanuman ju, bandhan kati sutras nivaro | Ko nahin janat hai jag men kapi, Sankatmochan naam tiharo ||

07

बंधु समेत जबै अहिरावन, लै रघुनाथ पाताल सिधारो। देबिहिं पूजि भली विधि सों बलि, देउ सबै मिलि मंत्र बिचारो। जाये सहाय भयो तब ही, अहिरावन सैन्य समेत संहारो। को नहीं जानत है जग में कपि, संकटमोचन नाम तिहारो॥

Bandhu samet jabai Ahiravan, lai Raghunath patal sidharo | Debihin puji bhali vidhi son bali, deu sabai mili mantra bicharo | Jaye sahay bhayo tab hi, Ahiravan sainya samet sanharo | Ko nahin janat hai jag men kapi, Sankatmochan naam tiharo ||

08

काज किए बड़ देवन के तुम, बीर महाप्रभु देखि बिचारो। कौन सो संकट मोर गरीब को, जो तुमसो नहीं जात है टारो। बेगि हरो हनुमान महाप्रभु, जो कछु संकट होय हमारो। को नहीं जानत है जग में कपि, संकटमोचन नाम तिहारो॥

Kaj kie bad devan ke tum, bir mahaprabhu dekhi bicharo | Kaun so sankat mor garib ko, jo tumso nahin jat hai taro | Begi haro Hanuman mahaprabhu, jo kachhu sankat hoy hamaro | Ko nahin janat hai jag men kapi, Sankatmochan naam tiharo ||

09

लाल देह लाली लसे, अरु धरि लाल लंगूर। बज्र देह दानव दलन, जय जय जय कपि सूर॥

Lal deh lali lase, aru dhari lal langur | Bajra deh danav dalan, jai jai jai kapi sur ||